Monday 30 March 2020


AMƆƆ ƐMƐRƐ OSARO OLLORWI, ƆNƐ EBO ELEME LANGUAGE CENTER Ͻ'Ͻ OCHŨSƐ NSÃ “ELEME COUNTING SYSTEM” ALA ƆTƆϽ ELEME, ALODE ƐDƐRƐ ACHU-RE-ESIRA'O EGETA RƐ Ɔ'Ɛ Ɛ'ϽRϽ OSO AGBA 2019
Ɔwajuiye!
Niniini be ɛgbɛrɛ egeta nɛɛ oku Eleme. Ebe ɛbɛrɛ egeta tĩrũ enu re ka nasã ɔ'ɔni nnini. Ɔbari abere jiɛnsi wee sai egeta rii nnini bãrã bũrekeɛ ɔnanaa bai titɛ ebo olo wee puma nɛɛi. Anyɔ ana ɛdaamɔ ɛbai rɛ wa kukula ɔbɔ ɔ'ɔni. Mma wii owe ɛdaamɔ obaa. Ɔwajuiyɛ!
Nwi mga chu ntS nnɔɔ wimà owé Ɛmɛrɛ Gregory Ollor bãrã ɛdaamɔ oku rɛT kara jɔɛnwɛ bT ete. Mma wii owe! Mga chu ntS nnɔ wimà owe ɔnɛ re eka bT Eleme Lokal Gɔfámɛt, Hon. Barr. Philip Okparaji. Mma wii owe Ɛmɛrɛ Eleme King Dr Philip Osaro Obele. Mma wii owe ɛmɛrɛ ɔ'oɛ ɔ'chũsɛ nsã nnini,Ɛmɛrɛ Gomba Okanje; mma wii owe ɔnɛ ochurɛ O'E'La Obor Eleme,  Chief Elder Israel Abbey; mma wii owe Ɛgbɛrɛ Ɛmɛrɛ Okori Eleme, King Dr Amb. Appolus Chu; mma wii owe Ɛmɛrɛ Ͻwa Eleme HRM (Mrs) Evenly Ada Gokpa; mma wii owe ebũrɛkɛɛ ndo bãrã mba rɛT ojui ju nwɛi ɔkarũ ochũsɛ nsã nnɔɔ. Ͻwajuiyɛ!
Mga chu ntS nnɔɔ kama ɛdaamɔ oku ogbo Eleme Language Center re ke rã jijii tĩrũ be enaa kɔɔ ekã Eleme achã nɛɛ nsi. Mma ka ɛdaamɔ oku rɛ ɛnwɛsɛrĩi ɔbɔrũ be emɔɛ kɔɔ o'ĩntĩtɛ nnɔɔ abã ako. Mma kɔɔ, ɔwanaienu! Ɔbari akásɛiye!
Eleme jũjũ nwɛ oso ɛkarabee enu. Eleme tSa ajɛ ekarabee ɔnanàá rĩi nnyɛ naarĩ rɛT ɛdɔ akaa. Obui bãrã onu obui dɔrũ be echichia oso ebo bĩi nnyɛ kara chã nɛɛ nsĩ wee obui ka bãrirũ. Ogũrũ obui oku Eleme dɔrũ echichia jɔnwɛ be enu ka chãri.
TT nsã nnɔɔ, “Eleme Counting System” be emɔɛ kɔɔ oku Eleme naa gbo mpɛm-mpɛm onu obui rɛT ɛchuɛ nama ogũrũ enu tStS be ekèré ekèré ojui nnyɛ kara naã; jijima oku rɛT ɛchuari obui namaa enu tɛmɛ odo enu, ofu echii ɔwa, ogbi enu, ɔchã ochira bãrã nnãrã nnãrã.
Ekã Eleme bãrã Eleme Language Center
Ekã Eleme be ekã rɛT Ɔbari chu nɛɛi ɛbai rɛT ke re be oku Eleme kɔɔ nnyɛ achuri nyamaansi, wee re chuɛ nama ɛdaamɔ enu. A'mmamarã agba 1970, Eleme Language Center dɔnsi bee ɛmɔɛ kɔɔ Ekã Eleme achã nɛɛ nsi wee chu o'ĩntĩtɛ nyɛ ajɛ ogũrũ ekã oso eNigeria bãrã oso ebo. RɛT wai na ajɔ ntito, wee ɔbɔ bai dɔdɔ ra rũ. RɛT wai sTɛ wee chusɛ M'I'A OSŨNA bãrã NNYIMƐSÕ bãrã ƐSÕ ELERA. Ogũrũ nsã nnɔɔ dɔri oso eChɔɔchi bai. Rida bai re ele bãrã rɛT ɔbɛrɛ dɔri oso eSukulu. Ewo eka eRida rɛT ke re wai sTɛi we re ka lesɛ adT kɔɔ oka nwɛsɛi ɔbɔrũ bee ɛkTT chusɛ beri: Ekã Eleme, Nsã Ɔdama Ɔnɔɔnɔ Aa Bii,  Nsã Ɔdama Elabi Abee Ogũrũ Enu bãrã ogũrũ nnãrã nsã rɛ ɔbɔ dɔriru ntito yaba.

Abɔrũ ɛnaa kɔɔ rɛT nyã kɔɔ Eleme Language Center rɛ gbogbo ɔtɔɔ ntito rɛ ɛwiiɛ ɔ'ɔ ntito (office), bãrã ogũrũ enu ntito tɛmɛ Tebulu, ɛgãrã, kSmputa bãrã ogũrũ nnãrã enu rɛT abɔrũ etSɛ ɔ'ɔ ntito. Soso, ɛgbɛrɛ ɛgbɛrɛ enwinwi Eleme nwɛsɛi ɔbɔrũ Eleme Language Center.

Nwi mga ka ɛdaamɔ obaa kɔɔ ɔwanaienu!
Ɔwajuiyɛ!
Ɛmɛrɛ Osaro Ollorwi
Chairman, Eleme Language Center
08036694027